வயிறு உப்பசம் பிரச்சினையால அவதிப்படறீங்களா? அளவுக்கு அதிகமாக உணவு எடுத்துக் கொள்வது, அஜீரணக் கோளாறு பிரச்சினைகள், ஆரோக்கியமற்ற (எண்ணெயில பொரித்த, அதிக கொழுப்புள்ள) உணவுமுறைகளும் தான் இந்த வயிறு உப்பசத்துக்கு காரணமாக இருக்கின்றன. இந்த பிரச்சினை உங்களுக்கும் இருந்தால் கீழ்வரும் இந்த 7 உணவுகளை எடுத்துக் கொண்டால் வயிறு உப்பசம் உடனடியாகக் குறையும். வாங்க அந்த உணவுகள் என்னென்ன என்று பார்க்கலாம்.
வயிறு உப்பசம் எப்போதும் ஒருவித அசௌகரியத்தையும் மனச்சோர்வையும் எரிச்சல் உணர்வையும் கொடுக்கும். எப்போது இந்த வயிறு வீக்கம் குறைகிறதோ அப்போதுதான் ஒட்டுமொத்த உடலுமே இலகுவாகவும் லேசாகவும் இருக்கும். அஜீரணக் கோளாறுகளும் குறையும். இந்த வயிறு உப்பசம் ஏற்படுவதற்கு நாம் எடுத்துக் கொள்ளும் உணவுகள் காரணமாக இருப்பது போல, சில உணவுகளை வைத்தே இந்த வயிறு உப்பசத்தை சரிசெய்து விட முடியும்.
இஞ்சி
இஞ்சியில் ஜிஞ்சரால் என்னும் பண்பு அதிகமாக இருக்கிறது. இது ஜீரண மண்டலத்தைப் பாதுகாப்பதோடு வயிறை இதமாக வைத்திருக்கச் செய்யும். வயிற்று அசௌகரியத்தையும் குறைக்கும்.
இஞ்சியை டீயாகவோ சாறாகவோ எடுத்துக் கொள்ளும்போது உணவுப் பாதை மற்றும் குடலில் ஏற்படும் இன்ஃபிளமேஷன்களைக் குறைக்கச் செய்யும். இதனால் வயிறு உப்பசம் உடனடியாகக் குறையும்.
யோகர்ட்
யோகர்ட் ப்ரோ – பயாடிக்ஸ் பண்புகள் நிறைந்த சூப்பர் ஃபுட். இது குடலில் நல்ல பாக்டீரியாக்களின் உற்பத்தியை அதிகரிக்கச் செய்து, ஜீரணத்தை மேம்படுத்தும்.
பொதுவாகவே தினமும் யோகர்ட் சாப்பிடும் பழக்கம் இருப்பவர்களுக்கு குடல் ஆரோக்கியமாகவே இருக்கும். ஆற்றலும் அதிகரிக்கும்.
வயிறு உப்பசமாக இருக்கும்போது ஒரு கப் யோகர்ட் சாப்பிட்டால் குடல் பாக்டீரியாக்கள் (நல்ல பாக்டீரியா) அதிகரித்து, வயிறு உப்பசம் குறைந்து விடும்.
வாழைப்பழம்
வாழைப்பழம் அதிக அளவு பொட்டாசியம் நிறைந்து இருக்கிறது. அதோடு வைட்டமின்கள் மற்றும் ஆற்றல் நிறைந்த மினரல்களும் அதிகமாகவே இருக்கின்றன.
வாழைப்பழம் சாப்பிடுவது உடலின் நீர்ச்சத்தையும் பிற நீர்மங்களையும் சமநிலையில் வைத்திருக்கச் செய்யும். இது உடலில் நீர்க்கோர்ப்பதையும் கட்டுப்படுத்தி வயிறு உப்பசத்தையும் கட்டுப்படுத்துகிறது.
வயிறு உப்பசமாக இருக்கும்போது வாழைப்பழத்தைச் சாப்பிட வயிறு உப்பசம் குறைய ஆரம்பிக்கும். அதனால் ஏற்படும் மலச்சி்க்கலும் தீரும்.
பப்பாளி பழம்
பப்பாளி பழத்தில் பபைன் என்னும் என்சைம் இருக்கிறது. அதோடு வைட்டமின் சி, வைட்டமின் ஏ ஆகிய வைட்டமின்களும் நார்ச்சத்துக்களோடு பிற ஊட்டச்சத்துக்களும் நிறைந்து இருக்கின்றன.
இவை புரதத்தை உடைத்து, ஜீரணத்தைத் துரிதப்படுத்தும் வேலையைச் செய்கிறது. உணவுகளை முழுவதுமாக உடைத்து, குடல் செயல்பாட்டை வேகமாக்கும். இதனால் வயிறு உப்பசம் குறையும.
வெள்ளரிக்காய்
வெள்ளரிக்காய் 90 சதவீதத்துக்கும் மேல் நீர்ச்சத்து நிறைந்து இருக்கிறது. அதோடு ஏராளமான ஊட்டச்சத்துக்களும் நார்ச்சத்தும் நிறைந்து இருந்திருக்கிறது.
வெள்ளரிக்காயில் ஆன்டி இன்ஃபிளமேட்டரி பண்புகளும் அதிகமாக இருக்கின்றன. வெள்ளரிக்காயைச் சாப்பிடுவதால் உடலில் உள்ள அதிகப்படியான நீரை வெளியேற்றும் வேலையைச் செய்கிறது.
வயிறு மற்றும் குடலில் தேங்கி உப்பசத்தை உண்டாக்கும் அதிகப்படியான நீரை வடிகட்டி வெளியேற்றும். இதனால் வயிறு உப்பசம் உடனடியாகக் குறையும்.
சோம்பு
பெருஞ்சீரகம் என்னும் சோம்பு உடல் ஆரோக்கியத்தை மேம்படுத்தும் ஆற்றல் வாய்ந்த மசாலா மூலிகைப் பொருளாகும். இந்த சோம்புக்கு வயிறு உப்பசம் மற்றும் வாயு உற்பத்தியையும் வாய்வுத் தேக்கத்தையும் குறைக்கும்.
வயிறு உப்பசத்தைக் குறைக்க சோம்புவை வாயில் போட்டு மென்று சாப்பிடுவது மட்டுமின்றி, சோம்பை டீயாகவும் எடுத்துக் கொள்வதன் மூலம் வயிறு உப்பசமும் குடலில் இருக்கும் வாய்வுக் கோளாறையும் இது சரிசெய்யும்.
அவகேடோ
அவகேடோவை வெண்ணெய் பழம் என்றும் அழைப்பார்கள். இந்த அவகேடோ ஒமேகா 3 கொழுப்பு அமிலம் மற்றும் வைட்டமின் ஈ ஆகியவை நிறைந்திருக்கின்றன.
இதிலிருக்கும் மோனோ அன்சாச்சுரேட்டட் கொழுப்பு அமிலங்கள் ஜீரணத்தை மேம்படுத்தி, வயிறு உப்பசத்தைக் குறைக்கும். இதில் நார்ச்சத்துக்களும் நிறைந்து இருப்பதால் ஜீரணத்தையும் எளிதாக்கும்.
